Beyond 5 Senses

Beyond 5 Senses

Posts tagged revolt

5 notes

yu tink a suh it a guh guh all de while
yu use wi every day
an tell wi fi pray
an tings wi get well
but wi still inna hell

wi a guh bun dung babylon

yu tink a suh it a guh guh all de while
year afta year
wi live inna fear
de yout dem cyaa get nuh wuck
dem a tun to garbage truck
while yu buil up yu mansion
an ave wi pon plantation
but mi a fiel slave
mi nuh know how fi behave

wi a guh bun dung babylon

 yu tink a suh it a guh guh all de while
yu gi de yout dope
while yu pray to de pope
fi gi yu more time
fi commit more crime
but de same yout yu dope
a guh tek it fi joke
an start a flame
not even yu can tame

im a guh bun dung babylon

yu tink a suh it a guh guh alll de while 
dat wi a guh run
everytime yu point yu gun 
an shoot one a wi
carelessly
one a dem time
wen yu tink tings ahrite 
wen yu get yu desire
yu house a guh ketch a fire

wi a guh bun dung babylon

well wi nuh a suh it a guh go all de while
yout a guh rise
an realize
dat de time is now
babylon mus bow
tings mus tun
fire mus bun 
our freedom mus come

wi a guh bun dung babylon 

Mutabaruka-Bun Dung Babylon

Filed under mutabaruka poetry jamaica occupy Wall Street revolt